Poet
zahir musafiron ka hunar ho nahin raha
chal bhi rahe hain aur safar ho nahin raha
kya hashr hai ki barish-e-naisan ke bavajud
paida kisi sadaf men guhar ho nahin raha
sub.h-e-visal kab se numudar ho chuki
napaid sham-e-hijr ka Dar ho nahin raha
qaa.il tamam shahr tire e.atibar ka
hona to chahiye tha magar ho nahin raha
baiThe hue hain der se shatir bisat par
mohara koi idhar se udhar ho nahin raha
lagta hai yuun qayam hai apna sara.e men
ham jis makan men hain vo ghar ho nahin raha
murda hue hain lafz ki patthar sama.aten
ḳhami kahin to hai ki asar ho nahin raha
‘gulzar’ sab ne peḌ ko sincha hai ḳhuun se
taqsim har kisi pe samar ho nahin raha
Leave a Reply