hamesha us ki manen ye gavara bhi nahin hota
baghair us shaḳhs ke lekin guzara bhi nahin hota
ḳhuda jaane ki ab yusuf ḳharide kyon nahin jaate
ba-zahir is tijarat men ḳhasara bhi nahin hota
zaruri to nahin ki har dua manzur ho jaa.e
magar is se baḌa koi sahara bhi nahin hota
mohabbat ki hararat se pighal jaate hain patthar bhi
sava neze pe suraj ko utara bhi nahin hota
yunhi manus avazen suna.i deti rahti hain
kisi ne jaane vaale ko pukara bhi nahin hota
ta.alluq sab se rakhte hain magar teri vasatat se
tumhara jo nahin hota hamara bhi nahin hota
Leave a Reply