chhanv ko takte dhuup men chalte ek zamana biit gaya
hasraton ki aghosh men palte ek zamana biit gaya
aaj bhi hain vo sulge sulge tere lab o aariz ki tarah
jin zaḳhmon par pankha jhalte ek zamana biit gaya
main ab apna jism nahin huun sirf tumhara saaya huun
mausam ki ye barf pighalte ek zamana biit gaya
ab tak apne haath na aaya surma.i chhanv ka daman bhi
chandi jaisi dhuup men jalte ek zamana biit gaya
vaqt madari hai kya jaane khel apna kab ḳhatm kare
sanson ki is Dor pe chalte ek zamana biit gaya
zindagi aur lamhon ka ta.aqub jin ka koi or na chhor
sadiyon sadiyon moḌ badalte ek zamana biit gaya
ab bhi tiri mehrab-e-suḳhan men sham.en si raushan hain ‘faza’
suraj ko ye aag ugalte ek zamana biit gaya
Leave a Reply