Figar Unnavi
aarzu hasrat-e-nakam se aage na baḌhi
fikr andesha-e-anjam se aage na baḌhi
su-e-manzil kabhi do gaam se aage na baḌhi
zindagi maut ke ilzam se aage na baḌhi
zulf-o-ruḳh ke sahar-o-sham se aage na baḌhi
ashiqi rahguzar-e-am se aage na baḌhi
rah ga.i rif.at-e-parvaz ki hasrat dil men
par-fishani qafas-o-dam se aage na baḌhi
manzil-e-be-ḳhudi-e-shauq ki azmat ma.alum
tishna-kamon ki nazar jaam se aage na baḌhi
kitni shamen ga.iin aur kitne savere aa.e
nigah-e-muntazir ik shaam se aage na baḌhi
paki-e-nafs ki azmat ka to kya zikr ‘figar’
zohd ki baat bhi ehram se aage na baḌhi
Leave a Reply