Sufi

Khushi Jaante Hain Na Gham Jaante Hain

khushi jante hain na gham jante hain

jo un ki raza ho vo ham jante hain

jo kuchh chaar tinkon ko ham jante hain

vo gulchin-o-sayyad kam jante hain

tumhare hi jalvon ki ham raushni ko

tajalli-e-dair-o-haram jante hain

main qatil na mahshar men samjhun bhi to kya

tumhen sab khuda ki qasam jante hain

miri khak-e-dil ka pata bhi nahin hai

vo itne sitam ko bhi kam jante hain

khuda ko khuda ham samajhte hain vaaiz

magar haan sanam ko sanam jante hain

karenge na arz-e-tamanna ki ham khud

mohabbat ka apni bharam jante hain

vahi kuchh samajhte hain asrar-e-hasti

jo hasti ko apni adam jante hain

mata-e-do-alam samajhte hain ham bhi

magar chaar tinkon se kam jante hain

kahin raz-e-ulfat bhi hota hai zahir

kahen kyon jo kuchh tum ko ham jante hain

khuda ko vahi khuub pahchante hain

tumhen jo khuda ki qasam jante hain

khuli hain dam-e-naza ankhen jo ‘afqar’

abhi tak vo ankhon men dam jante hain

More Poems

Leave a Comment