kahan furqat men hai dildar uthna baithna chalna
tere ashiq ko hai dushvar uthna baithna chalna
tumhara vahshi-e-laghar na thahra shahr men dam bhar
pasand aaya sar-e-kohsar uthna baithna chalna
faqirana kisi ke zer-e-sae ham bhi rahte hain
hamesha hai pas-e-divar uthna baithna chalna
kahen kya dosto is ishq ne aajiz kiya ham ko
giran hota hai ab har baar uthna baithna chalna
‘shabab’ is be-ḳhudi men mashghala hai bas yahi baaqi
miyan-e-kucha-e-dildar uthna baithna chalna