misal-e-a.ina rahna koi mazaq nahin
ki sach ko munh pe hi kahna koi mazaq nahin
suna hai aansu to ghaḌiyal ke bhi bahte hain
lahu ka aankh se bahna koi mazaq nahin
abhi hai vaqt sambhalo samaj ko logo
tamam qadron ka Dhahna koi mazaq nahin
mazaq jis men ki husn-e-mazaq hi na mile
mazaq aisa bhi sahna koi mazaq nahin
suḳhan-varon ko mazaq-e-suḳhan ka paas rahe
ghazal suḳhan ka hai gahna koi mazaq nahin
chaman ka ho ke bhi ahl-e-chaman se ai ‘azam’
hamesha ta.ane hi sahna koi mazaq nahin
Leave a Reply