ai miri jaan tujhe aur badalna hoga
phir mire saath kaḌi dhuup men chalna hoga
apne pairon pe abhi qarz-e-safar baaqi hai
hadd-e-imkan se aage bhi nikalna hoga
is se pahle ki Dhale raat naya din nikle
tire ḳhvabon ko mire ḳhvab men Dhalna hoga
inqilabat ka aghaz bhi hoga lekin
le ke parcham sar-e-bazar nikalna hoga
kamyabi ka yaqin duur na kar de ham ko
paas manzil ke zara aur sambhalna hoga
vadiyon men to kisi ḳhvab ki bhaTke hai ‘farogh’
tujh ko ta.abir ke sahra men bhi jalna hoga
Leave a Reply