Thahre to Kahan Thahre aaKHir Meri Binai

Asrarul Haq Asrar

Thahre to kahan Thahre aḳhir miri bina.i

har shaḳhs tamasha hai har shaḳhs tamasha.i

ye husn ka dhoka bhi dil ke liye kaafi tha

chhune ke liye kab thi mahtab ki uncha.i

a.ine ki hajat se inkar nahin lekin

is darja na tha pahle dastur-e-ḳhud-ara.i

sarmaya-e-dil aḳhir aur is ke siva kya hai

har dard se rishta hai har gham se shanasa.i

patthar sa haTe dil se kuchh mujh ko bhi kahne do

go talḳh to guzregi tum ko miri sachcha.i

shikva na karen ham bhi bharpur tavajjoh ka

dekha na karo tum bhi har zaḳhm ki gahra.i

duniya se nirala hai ‘asrar’ chalan apna

tanha.i men mahfil hai mahfil men hai tanha.i