aur ik shahr hai kya shahr-e-guman se aage
ham ko jaana hai bahut duur yahan se aage
gardish-e-pa kisi manzil pe Thaharti hi nahin
dil magar baḌhta nahin ku-e-butan se aage
gunjti rahti hain sahil ki sada.en har-dam
ham ne dekha hi nahin mauj-e-ravan se aage
mudda.a apna kisi shaḳhs pe zahir na hua
koi jaata hi nahin tarz-e-bayan se aage
zaḳhm qaa.el hon bhala charagari ke kaise
saf-e-dushman hai saf-e-chara-garan se aage
be-sabab ham se ḳhafa ho ga.i duniya ‘alam’
ham ne likkha hai kahan qissa-e-jan se aage
Leave a Reply