Poet
jo daagh hai ishq-e-dil-nashin ka jo dil-nashin hain dil-e-hazin ka
vahi hai tamgha miri jabin ka vahi sulaiman mire nagin ka
ga.i na mar kar bhi kina-ḳhvahi mila ke miTTi men ki tabahi
miri tarah se kahin ilahi falak bhi paivand ho zamin ka
taḌap na puchho dil-e-hazin ki kahun main tum se kahan kahan ki
usi se hai gardish asman ki usi se hai zalzala zamin ka
jahan sar par uTha raha huun junun men dhumen macha raha huun
jo dasht men ḳhaak uḌa raha huun dimagh gurdon pe hai zamin ka
karam men ham ko ghazab men ham ko kiya jo mumtaz sab men ham ko
tumhari dushnam-o-lab men ham ko maza mila zahr-o-angbin ka
ye laghari ab hai ḳhar-e-daman ki uTh nahin sakta bar-e-daman
jo paanv apna hai tar-e-daman to haath hai taar astin ka
miyan-e-mahshar malalaton se main sham.a huun dil ki halaton se
ki paanv tak sau ḳhijalaton se araq baha hai miri jabin ka
suḳhan ko ‘qadr’ auj de zaban se ki tuḳhm-e-afshan ho la-makan se
kiya hai ‘nasiḳh’ ne asman se buland-tar rutba is zamin ka
Leave a Reply