log bazar men phirte hain zarurat ke baghair
dil isi vaste bik jaata hai qimat ke baghair
main adhuri hi rahi ishq bhi puura na hua
alam-e-kun hai ye takmil ki surat ke baghair
har tamanna ke bagule se sada aati hai
aap kyon aa.e the is dasht men vahshat ke baghair
a.ina-ḳhane se kuchh bhi nahin mil paaya mujhe
main ne jab dekhna chaha kabhi hairat ke baghair
kya ajab taur se ujlat ka safar hai darpesh
log uTh kar chale jaate hain ijazat ke baghair
dil ḳharabe ke liye ḳhud ko bana bhi na saki
ḳhaak ta.amir karun ḳhaak ki hasrat ke baghair
Leave a Reply