le kar koi paigham kabutar nahin aate
ab gham bhi tira ruup badal kar nahin aate
kuchh boriyan aisi hain jo beron se ladi hain
par un pe kisi or se patthar nahin aate
har sub.h to khilte nahin nargis ke hasin phuul
har roz to gulshan men payambar nahin aate
har shaḳhs liye phirta hai hathon men saron ko
hathon men nazar ab kahin ḳhanjar nahin aate
bimar kahin ho na paḌosi chalo dekhen
ab raat men us samt se patthar nahin aate
qad apna baḌha lete hain baisakhi laga kar
jo log mire sar ke barabar nahin aate
uTh jaate hain be-saḳhta paanv tiri janib
ham dar pe tire soch-samajh kar nahin aate
darvaza bhula deta hain ik din unhen ‘ishrat’
jo log ki raton men bhi ghar par nahin aate
Leave a Reply