aag hai phaili hui kaali ghaTaon ki jagah
bad-dua.en hain labon par ab duaon ki jagah
intiḳhab-e-ahl-e-gulshan par bahut rota hai dil
dekh kar zagh-o-zaghan ko ḳhushnavaon ki jagah
kuchh bhi hota par na hote para-para jism-o-jan
rahzan hote agar un rahnumaon ki jagah
luT ga.i is daur men ahl-e-qalam ki aabru
bik rahe hain ab sahafi be-savaon ki jagah
kuchh to aata ham ko bhi jaan se guzarne ka maza
ghair hote kaash ‘jalib’ ashnaon ki jagah
Leave a Reply