asman ki aankh suraj chand binai bhi hai
raushni mere liye kyuun vaj.h-e-rusvai bhi hai
kis ko siine se lagaun main kise apna kahun
sail-e-rang-o-bu jise kahte hain tanhai bhi hai
maslahat andesha-e-gham ko zara kam kar gai
falsafa vo jhuut shamil jis men danai bhi hai
zahr-aluda faza men jab kali sone lagi
ashk-e-shabnam ne kaha gulshan men purvai bhi hai
fikr jaise aina-dar-aina raushan charagh
tirgi mere liye ehsas-e-raanai bhi hai
munkashif hote gae ham-surat-e-sang-e-vajud
zindagi husn-e-adam bhi kar-farmai bhi hai
sher kahne ka saliqa hai yahi ahmad-‘zafar’
shairon ne baat samjhi bhi hai samjhai bhi hai
Leave a Reply