Hasnain Aqib
kuchh silsile falak ke paḌe hain ujaaḌ se
rishte bane hue hain zamin ke pahaḌ se
be-jurm be-gunah asiron ki ḳhair ho
aati hain dam-ba-dam ye sada.en tihaḌ se
badnam hota hai vo jo aage dikha.i de
jalva dikhata aur hi koi hai aaḌ se
tum to chale ga.e miri duniya ko chhoḌ kar
lag kar khaḌa hai kaun ye dil ke kivaḌ se
andhi chale kabhi to salamat rahoge na
paude ne sar uTha ke ye puchha hai jhaaḌ se
be-faiz sar-bulandi ke qaa.il nahin hain ham
milta nahin hai saaya musafir ko taaḌ se
kitne ajiib log hain ‘aqib’ tumhare saath
hiron se bair ishq hai jin ko kabaḌ se
Leave a Reply