Jala Ke Aankhen Siyah Shab Ko Khangalna Hai

jalā ke āñkheñ siyāh shab ko khañgālnā hai

isī añdhere se ham ko sūraj nikālnā hai

jo baaqī chīzeñ haiñ vo to maiñ sab sambhāl lūñgā

tumheñ ye karnā hai sirf mujh ko sambhālnā hai

shikast jis kā nasīb hogī kuchh us kā socho

tumhārā kyā hai tumheñ to sikka uchhālnā hai

vo sañg-dil hai magar use mom kar rahā huuñ

inhīñ chaTānoñ se mujh ko dariyā nikālnā hai

vahī galī jis kī ham kabhī ḳhaak chhānte the

sitam to ye hai usī pe ab ḳhaak Dālnā hai

Leave a Comment