apni mahfil men agar mujh ko nahin paoge
aise halat men tum aur bhi ghabraoge
shauq se jaur-o-sitam mujh pe karo tum lekin
apni nadani pe ḳhud aap hi pachhtaoge
naz-o-andaz ki qimat hai tire mere sabab
kis ki mahfil men bhala aur ghazab Dhaoge
koi hoga nahin is jins-e-vafa ka talib
kaun hai mere siva jis ko ye dikhlaoge
kaaT lo meri zaban kaise vafadar kahun
haath men baale kaḌe paanv men pahnaoge
saḳht din apne is ummid pe guzre ‘ḳhushtar’
aaoge aaoge ab aaoge ab aaoge
Leave a Reply