Poet
koi baat aisi aaj ai meri gul-ruḳhsar ban jaa.e
ki bulbul baton baton men dam-e-guftar ban jaa.e
ayaan ho jazb-e-shauq aisa hasin aa.en ziyarat ko
miri turbat ka mela misr ka bazar ban jaa.e
mire hansne pe vo kahte hain aisa bhi na ho be-ḳhud
ki koi aadmi se qahqaha divar ban jaa.e
ta.ajjub kuchh nahin hai gar vafur-e-soz-e-furqat se
mira har mu-e-tan minqar-e-mausiqar ban jaa.e
Tahalte gar chale aa.en vo daghon ke tamashe ko
abhi sarv-e-charaghan mera jism-e-zar ban jaa.e
barahman shaiḳh ko kar de nigah-e-naz us but ki
gulu-e-zohd men tar-e-nazar zunnar ban jaa.e
agar ghar se ba-qasd-e-sair nikle vo kaman-abru
to bahr-e-ta.ir-e-dil har mizha sufar ban jaa.e
tabassum kar tamasha dekh ke vahshat ka phir zalim
mira chak-e-gareban zaḳhm-e-daman-dar ban jaa.e
yunhi hans hans ke tum ashiq ka rona dekhte jaao
ki har tar-e-nazar ik motiyon ka haar ban jaa.e
baḌhao manzilat tegh ada ki tund-ḳhui se
munasib hai jo ye shamshir jauhar-dar ban jaa.e
agar a.ina-e-dil saaf ho husn-e-tavajjoh se
har ik ankhon ka parda parda-e-asrar ban jaa.e
yahi hai ḳhun-baha chal kar zara kah do ishare se
‘habib-e-ḳhasta ka marqad pas-e-divar ban jaa.e
Leave a Reply