mujh pe mizrab to hai saaz kahan se la.un
dil men ghar karne ke andaz kahan se la.un
mere giton men bhi pur-kaif kashish hai lekin
ho asar jis men vo avaz kahan se la.un
meri har baat bata deti hain meri ankhen
jo rahe dil men hi vo raaz kahan se la.un
intiha hai to koi ibtida lazim hogi
apne anjam ka aghaz kahan se la.un
mere siine men bhi uḌne ki lalak hai lekin
toḌ de pinjra vo parvaz kahan se la.un
Leave a Reply