Abrar Ahmad
hava jab tez chalti hai
shikasta khvab jab matiyale raston par
murad-e-amn pakadte hain
jhuki shakhon ke honton par
kisi bhule hue naghme ki tanen
jab ulatti hain
guzishta vahm ki ankhen mire siine men girti hain
sitare jab larazte hain
miri ankhon ki sarhad par
ufuq dhund laane lagta hai
mahak aate dinon ki phail jaati hai
masham-e-jan men ik munh-zor khvahish
maut ban kar jagti hai jab
guzishta vahm ki ankhen mire siine men girti hain
gale jab vaqt milte hain
tire mere zamanon ke parinde
udne lagte hain
sahar jab dhimi dhimi dastakon men
niind ki jholi men girti hai
main tere haath
khvabon ke phisalte lams par mahsus karta huun
tire honton ki larzish
mujh se rukhsat men lipatti hai
main tujh ko dekh sakta huun
mujhe phir mil sakega vahima
jis qaid men aa kar
miri umren sanvarti hain
vo mausam jis men tere naam ki khushbu
miri sansen bhigoti hai
vahi ik shaam
jis anchal men mira dil dhadakta hai
vahi ik zindagi jis men
guzishta vahm ki ankhen mire siine men girti hain
Leave a Reply