raushni ki ye havas kya kya jalaegi na puchh
arzu-e-subh kitne zulm dhaegi na puchh
hosh men aaegi duniya meri be-hoshi ke baad
meri khamoshi vo hangama machaegi na puchh
nasl-e-adam rafta rafta khud ko kar legi tabah
itni sakhti se qayamat pesh aaegi na puchh
darmiyan jo jism ka parda hai kaise hoga chaak
maut kis tarkib se ham ko milaegi na puchh
jism ijazat de hi dega par simat jaane ke baad
ruuh kaise is qafas ko ghar banaegi na puchh
Leave a Reply