dost! main dekh chuka taj-mahal
…..vapas chal
marmarin marmarin phulon se ubalta hiira
chand ki aanch men dahke hue simin minar
zehn-e-shaer se ye karta hua chashmak paiham
ek malika ka ziya-posh o faza-tab mazar
khud ba-khud phir gae nazron men ba-andaz-e-saval
vo jo raston pe pade rahte hain lashon ki tarah
khushk ho kar jo simat jaate hain be-ras aasab
dhuup men khopdiyan bajti hain tashon ki tarah
dost main dekh chuka taj-mahal
…..vapas chal
ye dhadakta hua gumbad men dil-e-shahjahan
ye dar-o-bam pe hansta hua malika ka shabab
jagmagata hai har ik tah se mazaq-e-tafriq
aur tarikh udhati hai mohabbat ki naqab
chandni aur ye mahal alam-e-hairat ki qasam
duudh ki nahr men jis tarah ubaal aa jaae
aise sayyah ki nazron men khupe kya ye saman
jis ko farhad ki qismat ka khayal aa jaae
dost main dekh chuka taj-mahal
…..vapas chal
ye damakti hui chaukhat ye tila-posh kalas
inhin jalvon ne diya qabr-parasti ko rivaj
maah o anjum bhi hue jaate hain majbur-e-sujud
vaah aram-gah-e-malika-e-maabud-mizaj
didani qasr nahin didani taqsim hai ye
ru-e-hasti pe dhuan qabr pe raqs-e-anvar
phail jaae isi rauza ka jo simta daman
kitne jan-dar janazon ko bhi mil jaae mazar
dost main dekh chuka taj-mahal
…..vapas chal
Leave a Reply