Bata Kya Kya Tujhe Ai Shauq-E-Hairan Yaad Aata Hai

Rais Amrohvi

bata kya kya tujhe ai shauq-e-hairan yaad aata hai

vo jan-e-arzu vo rahat-e-jan yaad aata hai

pareshan-ḳhatiri had se guzarti hai to vahshat ko

kisi ka alam-e-zulf-e-pareshan yaad aata hai

guzarta hai kabhi jab chaudhvin ka chand badli se

mahin anchal men un ka ru-e-taban yaad aata hai

andheri raat men jugnu chamakte hain to rah rah kar

dupaTTe ke sitaron ka charaghan yaad aata hai

ufuq par phailti hain surḳhiyan jab sub.h-e-taza ki

koi siina pas-e-chak-e-gareban yaad aata hai

kali ko phuul bante dekh kar ahd-e-baharan men

koi chehra bahut nau-ḳhez-o-ḳhandan yaad aata hai

ghazal jab chheḌ deta hai koi ahd-e-javani ki

kisi ka jism-e-mauzun-o-ghazal-ḳhvan yaad aata hai

vo tufan karvaTen leta tha jo ik jism-e-ra.ana men

vo tufan ham-kinari ka vo tufan yaad aata hai

vo arman jo kisi ke shoḳh honTon par machalta tha

vo arman bosa-e-lab ka vo arman yaad aata hai

vufur-e-shauq se ḳhud haath apne chuum leta huun

vufur-e-shauq men jab un ka daman yaad aata hai

bahut kuchh yaad aata hai ‘ra.is’ un ki juda.i men

magar jaise koi ḳhvab-e-pareshan yaad aata hai