Najmus Saqib
va.ade ka e’tibar to hai vaqa.i mujhe
ye aur baat hai ki hansi aa ga.i mujhe
laa.i hai kis maqam pe varaftagi mujhe
mahsus ho rahi hai ab apni kami mujhe
samjhe hain vo junun to junun hi sahi mujhe
danista ab badalni paḌi zindagi mujhe
jalvon ki raushni men jo khoya tha pa gaya
tum se nazar mili to mohabbat mili mujhe
mahaul sazgar-e-mizaj-e-vafa na tha
duniya se bach ke un ki nazar dekhti mujhe
yuun rabt-o-zabt-e-shauq baḌhaya ba-tarz-e-nau
jaise ki pahle un se mohabbat na thi mujhe
‘naḳhshab’ miTaya jis ne vafaon ki aaḌ men
us bevafa se phir bhi mohabbat rahi mujhe
Leave a Reply