Kya Hain Shaida-E-Qadd-E-Yar darakht

Poet

kya hain shaida-e-qadd-e-yar darakht

hain jo shabnam se ashk-bar darakht

dekhen gar sarv-qad-e-yar darakht

khaak par loten saya-dar darakht

ashk-bar un pe hain jo murgh-e-chaman

pahne hain motiyon ka haar darakht

sar-kashi ki hai kya tire qad se

kaate jaate hain be-shumar darakht

kya tire qad se duun misal use

ki hai angusht zinhar darakht

tire jalve se nakhl-e-tur bane

hain jo bala-e-kohsar darakht

bed-e-majnun ko dekh o laila

hai ye majnun ka yadgar darakht

dekh kar tujh ko bhuul jaenge

gul khilaenge be-bahar darakht

zindagi men na main ne phal paaya

ho na mere sar-e-mazar darakht

faeda bhi yahan to nuqsan hai

sang khate hain bar-dar darakht

dagh-e-tan khil rahe hain surat-e-gul

ham hain goya shagufa-dar darakht