Aks Samastipuri
chhoḌ kar aise gaya hai chhoḌne vaala mujhe
dosto us ne kahin ka bhi nahin chhoḌa mujhe
bol-bala is qadar ḳhamoshiyon ka hai yahan
kaTne ko dauḌta hai mera hi kamra mujhe
haan vahi tasvir jo khinchi thi main ne saath men
haan vahi tasvir kar jaati hai ab tanha mujhe
baat to ye ba.ad ki hai kuchh banunga ya nahin
kuza-gar tu chaak pe to raqs karvata mujhe
bas isi ummid pe hota gaya barbad main
gar kabhi bikhra to aa kar tu sambhalega mujhe
aThvin shab bhi mahz kuchh ghanTon ki mehman hai
gar manana hota to ab tak mana leta mujhe
Leave a Reply