shab-e-gham men chha.i ghaTa kaali kaali
jhuki hai bala par bala kaali kaali
bahut aise kaale hiran ham ne dekhe
dikhate hain ankhen vo kya kaali kaali
DaTe mil ke rind-e-siyah-mast jis dam
jhuki mai-kade par ghaTa kaali kaali
shab-e-mah men vo phire baal khole
hui chandni ja-ba-ja kaali kaali
ye sajde ko ḳhud jhuk paḌegi chaman par
ki qible se uTThi ghaTa kaali kaali
khuli sab par aḳhir tiri garm-dasti
hui kholte hi hina ka kaali kaali
lunDha de mai-e-surḳh tu ab to saaqi
ghaTa uTThi hai dekh kya kaali kaali
mire ka.aba-e-dil ke miTne ka gham hai
jo oḌhe hai ka.aba saba kaali kaali
hue hain siyah-baḳht barbad lakhon
uThin andhiyan barha kaali kaali
buḳharat dil-e-ah par chha ga.e hain
ghaTa hai ba-ru-e-hava kaali kaali
main dekhunga munh un ka de kar ye fiqra
tiri shakl hai mah-laqa kaali kaali
siyah nama-e-‘qadr’ mahshar men nikla
uThi dhuup men ik ghaTa kaali kaali
Leave a Reply