hasraten ban kar nigahon se baras ja.enge ham
ek din aa.ega jab un ko bhi yaad a.enge ham
chandni ban kar kabhi daman pe lahra.enge ham
ban ke aansu gaah palkon par Thahar ja.enge ham
shaam ko jam-e-masarrat bhar ke chalka.enge ham
sub.h ko daur-e-charagh-e-bazm ban ja.enge ham
phir kahan pa.enge ham ko nau-urusan-e-chaman
jab faza-e-rang-o-bu men jazb ho ja.enge ham
TuuT ja.ega ghurur-e-bahr-e-na-paida-kanar
is tarah biphri hui maujon se Takra.enge ham
jab zamana ḳhud hi dhoka ban gaya ‘shaukat’ to phir
kaun jaane kis qadar dhoke abhi kha.enge ham
Leave a Reply