umr guzri hai to phir hosh ko rab yaad aaya
mar gaya shauq to phir is ka sabab yaad aaya
din ka aghaz hua aankh men aansu aa.e
avval-e-shab ka ziyan aḳhir-e-shab yaad aaya
mujh ko to yaad na tha us se juda ho jaana
vo to batlaya mujhe us ne to tab yaad aaya
ab ke shahron men bhi jangal ki hava aisi chali
maa.en bistar men chhupin bheḌiya jab yaad aaya
meri tarah se vo yak-rangi se tang aaya to
din ko phir raat men Dhal jaane ka Dhab yaad aaya
Leave a Reply