qadam yuun be-ḳhatar ho kar na mai-ḳhane men rakh dena
bahut mushkil hai jaan o dil ko nazrane men rakh dena
suna hai hazrat-e-va.iz idhar tashrif la.enge
zara us kasa-e-gardun ko mai-ḳhane men rakh dena
buton ke dil men yuun shayad ḳhuda ka ḳhauf paida ho
ye mere dil ke TukḌe ja ke but-ḳhane men rakh dena
yahan ai dil farishton ka bhi zohra aab hota hai
qadam asan nahin ulfat ke virane men rakh dena
chala hai ghar ko divana uḌa kar ḳhaak sahra ki
ghubar-e-ḳhatir-e-ahbab kashane men rakh dena
ziyarat ko vo dasht-e-najd ka jan-baz aa.ega
zara dam-bhar ko meri naash virane men rakh dena
ba-faiz-e-hazrat-e-naseh hui taufiq tauba ki
mira jam-e-shikasta un ke shukrane men rakh dena
munafi tha ye ai mansur dastur-e-amanat ke
kisi ki baat ko yuun apne begane men rakh dena
pila.i hai jo ‘vasif’ ko mai-e-mard-azma saaqi
to kuchh shan-e-ḳhudi bhi apne divane men rakh dena
Leave a Reply