be-nam si ḳhalish ki jo dil men jigar men hai
halchal bapa kiye hue ye bahr-o-bar men hai
jaati hui bahar ke manzar ko dekh kar
aati hui bahar ka manzar nazar men hai
hai diid avvalin bhi yaqinan hasin magar
baat aur hi nazara-e-bar-e-digar men hai
aa.egi ek manzil be-sham-o-be-sahar
pinhan ye raaz gardish-e-sham-o-sahar men hai
‘rahi’ vo ahl-e-dil hain ba-qaul-e-‘amir’ ham
saare jahan ka dard hamare jigar men hai
Leave a Reply