Dekh Kar Jauban Tera Kis Kis Ko Hairani Hui

dekh kar jauban tira kis kis ko hairani hui

is javani par javani aap divani hui

parde parde men mohabbat dushman-e-jani hui

ye khuda ki maar kya ai shauq-e-pinhani hui

dil ka sauda kar ke un se kya pashimani hui

qadr us ki phir kahan jis shai ki arzani hui

mere ghar us shokh ki do din se mehmani hui

bekasi ki aaj kal kya khana-virani hui

tark-e-rasm-o-rah par afsos hai donon taraf

ham se nadani hui ya tum se nadani hui

ibtida se intiha tak haal un se kah to duun

fikr ye hai aur jo kah kar pashimani hui

gham qayamat ka nahin vaaiz mujhe ye fikr hai

diin kab baaqi raha duniya agar faani hui

tum na shab ko aaoge ye hai yaqin aaya hua

tum na manoge miri ye baat hai maani hui

mujh men dam jab tak raha mushkil men the timardar

meri asani se sab yaron ki asani hui

is ko kya kahte hain utna hi badha shauq-e-visal

jis qadar mashhur un ki pak-damani hui

bazm se uthne ki ghairat baithne se dil ko rashk

dekh kar ghairon ka majmaa kya pareshani hui

dava-e-taskhir par ye us pari-vash ne kaha

aap ka dil kya hua mohr-e-slemani hui

khul gaiin zulfen magar us shokh mast-e-naz ki

jhumti bad-e-saba phirti hai mastani hui

main sarapa sajde karta us ke dar par shauq se

sar se pa tak kyuun na peshani hi peshani hui

dil ki qalb-e-mahiyat ka ho use kyunkar yaqin

kab hava mitti hui hai aag kab paani hui

aate hi kahte ho ab ghar jaenge achchhi kahi

ye misal puuri yahan man-mani ghar jaani hui

arsa-e-mahshar men tujh ko DhunD la.un to sahi

koi chhup sakti hai jo surat ho pahchani hui

dekh kar qatil ka khali haath bhi ji Dar gaya

us ki chin-e-astin bhi chin-e-peshani hui

kha ke dhoka us but-e-kamsin ne daman men liye

ashk-afshani bhi meri gauhar-afshani hui

bekasi par meri apni tegh ki hasrat to dekh

chashm-e-jauhar bhi ba-shakl-e-chashm-e-hairani hui

bekasi par ‘dagh’ ki afsos aata hai hamen

kis jagah kis vaqt us ki khana-virani hui

Leave a Comment