Shafiq Saleemi
rukun to rukta hai chalne pe saath chalta hai
magar giraft men aata nahin ki saaya hai
jhulas rahe hain badan dhuup ki tamazat se
ki raat bhar baḌe zoron ka abr barsa hai
abhi to kal ki thakan jism se nahin nikli
sitam ki aaj ka din bhi pahaḌ jaisa hai
samajh rahe the jise ek mehrban badal
vo aag ban ke hari ketiyon pe barsa hai
vo ek shaḳhs jise aaj tak nahin dekha
ḳhayal-o-fikr pe us shaḳhs ka ijara hai
dabiz pardon ke pichhe na jhankiye ki vahan
ga.e dinon ko nishani bana ke rakkha hai
‘shafiq’ DhunDne nikle the ghar se ham jis ko
vo kirchiyon ki tarah raston men bikhra hai
Leave a Reply