jaun-eliya

Dil Kitna Aabaad Hua Jab Did Ke Ghar Barbaad Hue

dil kitna abad hua jab diid ke ghar barbad hue

vo bichhda aur dhyan men us ke sau mausam ijad hue

namvari ki baat digar hai varna yaaro socho to

gulgun ab tak kitne teshe be-khun-e-farhad hue

laenge kahan se bol rasile honton ki nadari men

samjho ek zamana guzra boson ki imdad hue

tum meri ik khud-masti ho main huun tumhari khud-bini

rishte men ik ishq ke ham tum donon be-buniyad hue

mera kya ik mauj-e-hava huun par yuun hai ai ghuncha-dahan

tu ne dil ka baagh jo chhoda ghunche be-ustad hue

ishq-mohalle men ab yaaro kya koi maashuq nahin

kitne qatil mausam guzre shor hue fariyad hue

ham ne dil ko maar rakha hai aur jatate phirte hain

ham dil zakhmi mizhgan khunin ham na hue jallad hue

barq kiya hai aks-e-badan ne tere hamen ik tang qaba

tere badan par jitne til hain saare ham ko yaad hue

tu ne kabhi socha to hoga socha bhi ai mast-ada

teri ada ki abadi par kitne ghar barbad hue

jo kuchh bhi rudad-e-sukhan thi honton ki duuri se thi

jab honton se hont mile to yak-dam be-rudad hue

khak-nashinon se kuche ke kya kya nakhvat karte hain

janan jaan tire darban to firaun-o-shaddad hue

shahron men hi khaak uda lo shor macha lo be-ja lo

jin dashton ki soch rahe ho vo kab ke barbad hue

samton men bikhri vo khalvat vo dil ki rang-e-abadi

yaani vo jo bam-o-dar the yaksar gard-o-bad hue

tu ne rindon ka haq maara mai-khane men raat gae

shaikh khare sayyad hain ham to ham ne sunaya shaad hue

More Poems

Leave a Comment