Subh Har Ujale Pe Raat Ka Guman Kyun Hai

subh har ujale pe raat ka guman kyuun hai

jal rahi hai kya dharti arsh pe dhuan kyuun hai

khanjaron ki sazish par kab talak ye khamoshi

ruuh kyuun hai yakh-basta naghma be-zaban kyuun hai

rasta nahin chalte sirf khaak udate hain

karvan se bhi aage gard-e-karvan kyuun hai

kuchh kami nahin lekin koi kuchh to batlao

ishq is sitamgar ka shauq ka ziyan kyuun hai

ham to ghar se nikle the jitne ko dil sab ka

tegh haath men kyuun hai dosh par kaman kyuun hai

ye hai bazm-e-mai-noshi is men sab barabar hain

phir hisab-e-saqi men suud kyuun ziyan kyuun hai

den kis nigah ki hai kin labon ki barakat hai

tum men ‘jaafari’ itni shokhi-e-bayan kyuun hai

Leave a Comment