gul-e-ḳhush-numa ke libas men ki shua-e-nur men Dhal ke aa
tujhe DhunDh legi miri nazar tu hazar rang badal ke aa
tire dil ki aag haqiqatan tire haq men fasl-e-bahar hai
jo bujha.e se bhi na bujh sake usi dil ki aag men jal ke aa
tiri justuju bhi hijab hai tiri aarzu bhi hijab hai
kabhi dam-e-aql-o-shu.ur se jo nikal sake to nikal ke aa
ye hai ahl-e-zarf ki anjuman ye hai ahl-e-ishq ka mai-kada
tu hazar nashshe men chuur ho jo yahan pe aa to sambhal ke aa
mah-o-mehr men bhi hai dilkashi magar us ki baat hai aur hi
tujhe arzu-e-jamal hai to harim-e-naz men chal ke aa
ye junun-e-ishq ki shaan hai tujhe log kuchh bhi kaha karen
jo ata-e-ku-e-habib hai vahi ḳhaak chehra pe mal ke aa
asar-afrin-e-bahar hai tiri fikr ‘sha.ir’-e-ḳhush-nava
jinhen chhu sake na ḳhizan kabhi vahi phuul le ke ghazal ke aa
Leave a Reply