Jalal Lakhnavi
shab-e-va.ada hai tu hai aur main huun
hujum-e-arzu hai aur main huun
dil-e-begana-ḳhu hai aur main huun
baghal men ik adu hai aur main huun
miTata hi raha jis ko muqaddar
vo meri aarzu hai aur main huun
pareshan-ḳhatiri kahti hai apni
kisi ki justuju hai aur main huun
shab-e-tanha.i-e-furqat men dil se
kuchh us ki guftugu hai aur main huun
gulistan-e-jahan hai qabil-e-sair
tilism-e-rang-o-bu hai aur main huun
nigah-e-lutf-e-dilbar ka hai iz.har
phaTe dil ka rafu hai aur main huun
kahin chhoḌa agar qatil ka daman
tu phir mera lahu hai aur main huun
‘jalal’ us ko banaya us ne dushman
qayamat men adu hai aur main huun
Leave a Reply