dil ki duniya dekh kar kyuun rang-e-duniya dekhte
dekhne vaalo nahin ham dekh kar kya dekhte
jalva-gah-e-dil men aa jaate vo be-parda agar
ham bhi rang-e-be-ḳhudi ham rang-e-musa dekhte
chaudhvin ka chand hota hai daraḳhshan jis tarah
yuun tasavvur men kisi ko jagmagata dekhte
gharq ho jaate mohabbat men mohabbat-ashna
sahil-o-dariya se bhi kar ke kinara dekhte
jazb ho kar rah ga.e ḳhud hi nigah-e-barq men
kyunkar ankhon se nasheman apna jalta dekhte
main kabhi jalva huun tera tu kabhi partav mira
umr guzri ja rahi hai ye tamasha dekhte
hote vo jalva-numa gul-paikar-o-gul-pairahan
ham unhen ‘maḳhmur’ firdaus-e-tamasha dekhte
Leave a Reply