Zarur Waqt Hi Kuchh Chaal Chal Raha Hoga

zarur vaqt hi kuchh chaal chal raha hoga

vahi bisat pe mohre badal raha hoga

utar raha hai sabhi raston se ik dariya

pahad barf ka koi pighal raha hoga

use khilaune diye the kisi ne bachpan ke

vo ek paaon pe ab bhi uchhal raha hoga

libas apna badal aaya tha bahut pahle

vo ab to shakl hi apni badal raha hoga

nahin hai aur kisi men ye hausla itna

hava ke saath parinda hi chal raha hoga

hava yunhi nahin aati hai ghusse men ‘sima’

charagh koi kahin par to jal raha hoga

Leave a Comment