lamha lamha dard Tapakta rahta hai
jaane andar kaun sisakta rahta hai
ik aahaT si hoti rahti hai dil men
is sahra men kaun bhaTakta rahta hai
hijr-zada ik ashiq mahv-e-gham akasr
maazi ke auraq palaTta rahta hai
phuul si koi yaad hai us se vabasta
mere dil ka zaḳhm mahakta rahta hai
dil jaise mele men khoya ik bachcha
har aahaT ki or lapakta rahta hai
sar par itni dhuup safar hai sahra men
mera saara jism jhulasta rahta hai
dil men itni aag nahin jo jal uTThe
bas yunhi chup-chap sulagta rahta hai
Leave a Reply