baithe hain jahan saaqi paimana-e-zar le kar
us bazm se uth aae ham dida-e-tar le kar
yadon se tiri raushan mehrab-e-shab-e-hijran
dhundhenge tujhe kab tak qindil-e-qamar le kar
kya husn hai duniya men kya lutf hai jiine men
dekhe to koi mera andaz-e-nazar le kar
hoti hai zamane men kis tarah pazirai
niklo to zara ghar se ik zauq-e-safar le kar
rahen chamak utthengi khurshid ki mashal se
hamrah saba hogi khushbu-e-sahar le kar
makhmal si bichha denge qadmon ke tale sahil
dariya ubal aenge sad-mauj-e-guhar le kar
pahnaenge taaj apna pedon ke ghane saae
niklenge shajar apne khush-rang samar le kar
lapkenge gale milne sarv aur sanobar sab
uthenge gulistan bhi shakh-e-gul-e-tar le kar
hanste hue shahron ki avaz bulaegi
lab jaam ke chamkenge sau shoala-e-tar le kar
aflak bajaenge saaz apne sitaron ka
gaenge bahut lamhe anfas-e-sharar le kar
ye alam-e-khaki ik sayyara-e-raushan hai
aflak se takra do taqdir-e-bashar le kar
Leave a Reply