Urooj Qadri
tire darida gareban men ye rafu kya hai
tujhe ḳhabar nahin majnun ki aabru kya hai
mujhe to aap ki ankhon ne kar diya sarshar
mujhe ḳhabar hi nahin jaam kya subu kya hai
na jaane hoga bhi donon men ittifaq kabhi
mizaj-e-husn hai kya meri aarzu kya hai
majaz hai ki haqiqat savab hai ki gunah
pata nahin ki ye duniya-e-rang-o-bu kya hai
lahu to vo hai jo uble shahid ki rag se
rag-e-gulu se na ubla to phir lahu kya hai
mujhe hai jurm-e-mohabbat ka e’tiraf ‘uruj’
miri saza men koi bahs-o-guftugu kya hai
baḌe baḌon ke qadam jis maqam par larzen
‘uruj’ tu hi bata us jagah pe tu kya hai
Leave a Reply