Ye Andhera Jo Ayan Subh Ki Tanwir Mein Hai

ye añdherā jo ayaañ sub.h kī tanvīr meñ hai

kuchh kamī ḳhūn-e-jigar kī abhī tasvīr meñ hai

ahl-e-taqdīr ne sar rakh diyā jis ke aage

aaj vo uqda mire nāḳhun-e-tadbīr meñ hai

rañg-e-gul rañg-e-butāñ rañg-e-jabīn-e-mehnat

jo hasīñ rañg hai shāmil mirī tasvīr meñ hai

maiñ ne jis ḳhvāb ko āñkhoñ meñ basā rakkhā hai

tū bhī zālim mire us ḳhvāb kī ta.abīr meñ hai

le uḌī mauj-e-bahārāñ ye alag hai varna

aaj bhī paañv mirā ḳhāna-e-zanjīr meñ hai

vo mire pūchhne ko aa.e haiñ sach-much ‘aḳhtar’

yā koī ḳhvāb-e-hasīñ manzil-e-ta.abīr meñ hai

Leave a Comment