ye andhera jo ayaan sub.h ki tanvir men hai
kuchh kami ḳhun-e-jigar ki abhi tasvir men hai
ahl-e-taqdir ne sar rakh diya jis ke aage
aaj vo uqda mire naḳhun-e-tadbir men hai
rang-e-gul rang-e-butan rang-e-jabin-e-mehnat
jo hasin rang hai shamil miri tasvir men hai
main ne jis ḳhvab ko ankhon men basa rakkha hai
tu bhi zalim mire us ḳhvab ki ta.abir men hai
le uḌi mauj-e-baharan ye alag hai varna
aaj bhi paanv mira ḳhana-e-zanjir men hai
vo mire puchhne ko aa.e hain sach-much ‘aḳhtar’
ya koi ḳhvab-e-hasin manzil-e-ta.abir men hai
Leave a Reply