P P Srivastava Rind
ehsas-e-be-talab ka hi ilzam do hamen
rusva.iyon ki bhiiḌ men in.aam do hamen
ḳhuddariyon ki dhuup men aram do hamen
saughat men hi gardish-e-ayyam do hamen
ehsas-e-lams jism ki is bhiiḌ men kahan
kaali ruten gunah ka paigham do hamen
gum-sum hisar-e-rabt men hai lamha-e-azab
ḳhvahish ka karb fitrat-e-badnam do hamen
be-zariyon ko dasht-e-nafas men sameT kar
dard-ashna junun ke ahkam do hamen
dasht-e-sarab-e-sang hai maazi ka iztirab
gar ho sake to mustaqil aram do hamen
saughat men mili hai mujhe ra.egan shafaq
kis ne kaha hai is ka bhi ilzam do hamen
yadon ka ik hujum hai ai ‘rind’ aur ham
fursat nahin hai in dinon aram do hamen
Leave a Reply