main use sochta raha ya.ani
vo mira ḳhvab hai ḳhuda ya.ani
hijr se hijr tak thi ye hijrat
vo mila ya.ani kho gaya ya.ani
gardish-e-mehr-o-mah ka hasil
ya.ani mera vajud la-yani
dil kahan shahsavar-e-duniya tha
so gira gir ke mar gaya ya.ani
to mujhe us ka naam bhuul gaya
ho gaya main bhi lapata ya.ani
kaam ki baat puchhte kya ho
kuchh hua kuchh nahin hua ya.ani
chalte rahiye to suukh ja.ega
ye samundar ye aabla ya.ani
ya.ani tum se to main mila hi nahin
vo koi aur shaḳhs tha ya.ani
koi avaz TuTne ki nahin
dil men ik baat hai ḳhala ya.ani
us ko ḳhush dekh kar vahan ‘babar’
main bhi ḳhush tha udaas tha ya.ani
Leave a Reply