Shahnaz Parveen Sahar
be-samar mausamon men janmi huun
zard patton ka dukh samajhti huun
raftagan bhed oḌh lete hain
apne abba ki qabr DhunDhti huun
mera bachpan bichhaḌ gaya mujh se
ik saheli se ruuTh baiThi huun
ḳhamushi ki guphaon men aksar
apni avaz sun ke sahmi huun
ghar ki divar men hi rahta hai
ek saa.e se Darti rahti huun
mujh ko barish aziiz hai lekin
khiḌkiyan band kar ke roti huun
ḳhvab hain ya ḳhayal ki duniya
raftagan ke qarib rahti huun
vo jo ik bevafa ki ḳhatir the
ab unhi ansuon pe hansti huun
aap hi apni maan rahi huun ‘sahar’
maan hi jaisi dikha.i deti huun
Leave a Reply