shaam Dhale us bazm-e-tarab men mera jaana ḳhuub hua
mujh ko achanak samne pa kar vo kitna mahjub hua
dasht-e-sitam men kitni saliben istada thiin char-taraf
shaah ke haath pe bai.at kar li koi na yaan maslub hua
rusva.i ke saa.e hamesha pichha karte rahte hain
mujh se gurezan ho kar bhi vo mujh se hi mansub hua
kucha-e-yar men jaana ho to tark-e-ana hai pahla qadam
ishq kisi se kya karta vo jo apna mahbub hua
ujḌi jab se mahfil-e-yaran taur badal ga.e jiine ke
zaḳhm mira pairahan Thahra dard mira uslub hua
ahd-e-nau ki ijadon se lazzat-e-nama-bari bhi ga.i
shishe par kuchh harf likhe hain ye kaisa maktub hua
apne aib pe chashm-e-zamana mushkil hi se jaati hai
be-chehra the dekhne vaale a.ina ma.atub hua
rah ga.e kuchh yadon ke saa.e kuchh lafzon ki raushaniyan
aḳhir meri umr ka suraj Dhalte Dhalte ghurub hua
Leave a Reply