kis munh se karun main tan-e-uryan ki shikayat
daman ki shikayat na gareban ki shikayat
kaisa hi khatakta rahe dil men mire paikan
mujh se to na hogi kabhi mehman ki shikayat
itna bhi taghaful nahin achchha kahin tum ko
karni na pade shorish-e-pinhan ki shikayat
allah rakhe mire tasavvur ko salamat
tujh ko to nahin hai shab-e-hijran ki shikayat
hon lang magar vaqif-e-adab-e-junun huun
main kufr samajhta huun bayaban ki shikayat
kahti hai tiri chashm ki gardish mire hote
koi na kare gardish-e-dauran ki shikayat
jaate to ho kaabe ko khuda ke liye ‘mail’
karna na kisi dushman-e-iman ki shikayat