Poet
sukun-e-dil ke liye aur qarar-e-jan ke liye
tumhara naam hai kaafi miri zaban ke liye
jo pur hai jaam to kuchh ḳhauf-e-hadsat nahin
hamare paas bhi bijli hai asman ke liye
ḳhmushi-e-rah-e-manzil se ye hua sabit
ki manzilen bhi tarasti hain karvan ke liye
misal-e-shams-o-qamar gardishon men rahte hain
ḳhuda ne jin ko banaya hai asman ke liye
havas ne ḳhuld ajal ne chhuḌa.i ye duniya
ḳhabar nahin miri miTTi hai ab kahan ke liye
shab-e-firaq dua maang kar guzari hai
kabhi asar ke liye aur kabhi fughan ke liye
hamare zehn men dil men lahu men urdu hai
jiyenge aur marenge isi zaban ke liye
pahunch ga.e sar-e-manzil jo ham-safar the ‘falak
hamin taraste rahe gard-e-karvan ke liye
Leave a Reply